Kynnti allsherjarnefnd sér ekki allar aðstæður?

Eitt af því sem ég velti fyrir mér þegar "Jónínumálið" ber á góma og hafandi í huga að Bjarni Benediktsson formaður allsherjarnefndar heldur því fram að nefndarfólki hafi verið alls ókunnugt um tengsl umsækjandans við tengdamóður sína, Jónínu umhverfisráðherra, er hvort nefndarmenn kynni sér almennt ekki alla helstu hagi umsækjenda um ríkisborgararétt? Hversu lengi þeir hafi verið í landinu, hvort þeir hafi þak yfir höfuðið, hvernig fjölskylduaðstæðum þeirra er háttað? Er þá ekki annað af tvennu ljóst: Annað hvort hafa þeir unnið vinnuna sína og þar af leiðandi hljóta þeir að hafa vitað um tengsl stúlkunnar við Jónínu Bjartmarz, eða þá að þeir hafi ekki unnið vinnuna sína!

Ef við gerum ráð fyrir að þingmennirnir hafi unnið vinnuna sína, sem ég tel líklegra en hitt, að þá má spyrja hvernig stendur á þessari niðurstöðu? Því þó svo ég hafi ekkert í sjálfu sér á móti því að þessari stúlku per se hafi verið veittur ríkisborgararéttur, að því gefnu að aðstæður hennar hafi verið meira knýjandi en aðstæður allra hinna sem var neitað á sama tíma, að þá virðist það einfaldlega ekki hafa verið svo. Af framkomnum upplýsingum eru tilgreindar ástæður hennar fyrir að fá að fara fremst í röð umsækjanda léttvægar, miðað við aðstæður annarra sem hafa sagt sögu sína en allsherjarnefnd hefur neitað um ríkisborgararétt.

Það virðist blasa við að afgreiðsla allsherjarnefndar í þessu máli er ekki réttlát þegar hafðar eru í huga erfiðari aðstæður annars fólks sem nefndin synjaði. Því kemur upp spurningin hvort nefndin hafi verið beitt þrýstingi með einhverjum hætti eða hvort hún vildi gera einhverjum greiða - nema hvoru tveggja sé. Ég reikna með að við almenningi blasi að sá aðili sem samtímis hafði hagsmuna að gæta og var um leið  í tengslum við nefndarmenn, var enginn annar en Jónína sjálf.

Ef að Jónína hefði viljað gæta pólitískra hagsmuna sinna svona korteri fyrir kosningar, þá hefði hún eflaust átt að sjá það í hendi sér að aðstæður tengdadótturinnar voru ekki slíkar að líkur væru á að hún fengi ríkisborgararétt og því ráðlagt henni að bíða. Nema að Jónínu hafi verið kunnugt um fleiri dæmi um hliðstæða afgreiðslu allsherjarnefndar. Ekki veit ég.

Hitt er ljóst að persóna umræddrar stúlku er ekki miðdepill þessarar umræðu og stórfurðulegt að sjá keppinaut Kastljóssins, Ísland í dag, tromma upp með hana í viðtali! Rétt eins og hún hefði eitthvað nýtt til málanna að leggja sem réttlætti aðgerðir allsherjarnefndar. En kannski átti hún að vera karkatervitni fyrir tengdamóður sína. Auðvitað er þetta hin vænsta stúlka eins og umsjónarmenn þáttarins virtust leggja sig í líma við að sýna. En ef að það hefði átt að sannfæra landsmenn um að hún ætti þar af leiðandi erindi sem nýr og nýtur ríkisborgari, þá var auðvitað á sama tíma verið með óbeinum hætti að gefa til kynna að aðrir sem hafa haft veigameiri ástæður fyrir umsókn en fengið hafa neitun, væru eitthvað síðri. En það hefur auðvitað ekki verið ætlunin hjá fyrrum spunameistara Framsóknarflokksins, vini mínum Steingrími Sævari Ólafssyni.

Guðjón Ólafur: „Umfjöllun má ekki einkennast af dylgjum"

Athugasemdir

[Kristín Dýrfjörð, 3.5.2007 kl. 22:41]

En þú veist Palli með því að setja málið fram á  persónulegan hátt, með því að tengja það við yndislega lifandi manneskju á að snúa umræðunni. Frá grundvalalratriðum, bæði varðandi vinnubrögð alls kerfisins í  þágu eins og frá vandamálum allra þeirra pólitíkusa sem hafa fengið á sig kusk við afgreiðslu málsins.  Gerum þetta að nornaveiðum gagnvart þessari ungu konu.  Undireins  kemst það á bannlista þjóðarinnar, spunameistararnir kunna sitt jobb.

[Friðrik Þór Guðmundsson, 4.5.2007 kl. 00:34]

Vangaveltan um hvort nefndarmennirnir hafi unnið vinnuna sína eða ekki hittir beint í mark. Vitaskuld hljóta nefndarmennirnir að velta fyrir sér hvort hagir umsækjandans teljist öryggir og framfærsla hennar trygg. Nefndarmenn hljóta að hafa viljað sjá fram á að hún væri í góðum höndum ef eitthvað kæmi upp á, verandi ung stúlka langt frá sínum heimahögum og kynfjölskyldu. Og að sjálfsögðu verður ekki einblýnt á mál hennar nema í samanburði við það annað fallega og kurteisa og sjarmerandi fólk sem sótti um en hlaut ekki náð fyrir augum nefndarmannanna.

[Kolgrima, 4.5.2007 kl. 14:59]

Hvurslags Palli, ert þú á móti konum?

[Páll Helgi Hannesson, 4.5.2007 kl. 16:17]

Ert þetta þú gamla? :-)

[Kolgrima, 4.5.2007 kl. 17:12]

 Stendur eitthvað um það í Njálu?